Checheniston rahbari Ramzan Qodirov o‘zining Ukrainaning sanksiyalari ro‘yxatiga kiritilgani bilan bog‘liq xabarlarga munosabat bildirdi. “TASS” xabariga ko‘ra, 16-sentabr kuni e’lon qilingan mazkur ro‘yxatdan, Qodirovdan tashqari, Rossiya va boshqa mamlakatlarning 388 nafar yuqori martabali amaldorlar va jurnalistlari o‘rin olgan.
“Aytishlaricha, u yerda Pyotr Poroshenko sanksiyalar to‘g‘risida qandaydir farmon chiqaribdi. To‘g‘risini aytsam, shu janob Poroshenkoga achinaman. Uning bir olam muammosi bor, lekin u menga nisbatan qandaydir sanksiya e’lon qilyapti. Emishki, Ukrainaning eng asosiy dushmani — Rossiya. Poroshenko keladi va ketadi, xalq esa qoladi. Kiyevdagi hokimiyat egalari qanchalar harakat qilmasin, Ukrainani Amerikaga olib keta olmaydi, Amerikani Ukrainaga olib kela olmaydi”, — deb yozadi Qodirov ijtimoiy tarmoqlardagi sahifalarida.
“O‘zimga-o‘zim savol beryapman: Ukraina banklaridagi hisob-raqamlarimsiz va Ukrainaga bormay qanday yashayman endi?! Agar jiddiylashadigan bo‘lsak, bundan-da ahmoqona hujjat bo‘lishi mumkin emas. Hech bo‘lmasa Ukraina fuqarolarini kuldirmang — sizning bu kabi farmonlaringiz sovunning ko‘pigidek hech qanday ahamiyatga ega emasligini ular juda yaxshi biladi. Kiyevda mening hech qanday hisob-raqamim yo‘q, u yerga borgim kelib qolsa, hech kim hech qachon meni to‘xtata olmaydi”, — deya qo‘shimcha qildi Qodirov.
Qo‘shimcha sifatida, Checheniston rahbari Ukraina xalqiga tinchlik va farovonlik tiladi.
Izoh (0)