Восточний космодроми қурилишида беш миллиард рубль талон-тарож қилинган

Восточний космодроми қурилиши учун Россия бюджетидан ажратилган маблағларнинг камида 5,4 миллиард рубли талон-тарож қилинган. Бу ҳақда Meduza хабар бермоқда.

Тергов маълумотларига кўра, маблағларни ўғирлашда нафақат «Далспецстрой» раҳбарлари, балки уларнинг қўл остидагилар ҳам қатнашган. Хусусан, гумонланувчилар орасида қурилиш ташкилоти филиалларидан бирининг собиқ бош ҳисобчиси ҳам бор.

Жиноят иши юзасидан тергов ҳаракатлари давом этмоқда. Тергов Россиянинг 20 дан ортиқ субъектлари ҳудудини қамраб олган», — дея, тергов тафсилотларидан хабардор манбага асосланиб, «Интерфакс» хабар бермоқда.

Ҳуқуқни муҳофаза қилиш органлари Амур вилоятидаги Восточний космодроми қурилиши билан боғлиқ бир неча жиноят ишлари бўйича тергов олиб бормоқда. Шундай ишларнинг бири доирасида «Далспецстрой» корхонаси собиқ раҳбари Юрий Хризман ва унинг бир неча ходими космодром қурилиши учун ажратилган маблағларнинг камида 1,8 миллиард рублини ўзлаштирганликда айбланмоқда.

Восточний космодроми қурилиши билан боғлиқ яна бир неча жиноят ишлари бўлиб, улар қурилишга жалб этилган ишчиларнинг маошлари тўланмагани билан боғлиқ. Мазкур жиноят ишлари бўйича бир қатор пудратчи ташкилотларнинг раҳбарлари ҳибсга олинган.