Германия Ташқи ишлар вазирлиги мамлакатга келаётган қочоқларда «ёлғон тасаввур ва хато умидлар» пайдо бўлишининг олдини олиш мақсадида ахборот-ташвиқот кампаниясини бошлади. Бу ҳақда «Корреспондент.net» хабар бермоқда.
Spiegel Online нашри маълумотларига кўра, ташвиқот ишлари қочоқлар келаётган ва уларни ўтказиб юбораётган мамлакатларда олиб борилади. Вазирлик вакилларининг қайд этишича, аксарият ҳолларда қочоқларни жўнатиш орқали пул ишлаб қолиш ниятида бўлган контрабандачилар «қасддан ёлғон маълумот» тарқатмоқда.
Германиянинг баъзи мамлакатлардаги элчихоналари миш-мишларга қарши кураш бўйича ташвиқот ишларини бошлаган. Хусусан, Германиянинг Афғонистондаги элчихонаси Twitter’даги ўз саҳифасида контрабандачиларга ишонмасликка ва биринчи кирган мамлакатида бошпана сўрашга чақирмоқда.
Германиянинг Қоҳирадаги элчихонаси эса Германиядан бошпана олиш имкониятлари ҳақида ёзиб чиқди. «Германия 800 минг қочоқни қабул қилишга рози бўлгани ҳақидаги хабарлар ёлғон. Бу 2015 йилда Германиядан бошпана сўраши кутилаётган қочоқлар сонига боғлиқ статистик тахмин. Уларнинг аксарияти, катта эҳтимол билан, қочоқ сифатида тан олинмайди ва мамлакатни тарк этишга мажбур бўлади», — деб ёзади элчихона сайти.
Изоҳ (0)