Франция президенти Франсуа Олланднинг маълум қилишича, унинг мамлакати яқин икки йил ичида 24 минг қочоқни қабул қилишга тайёр. Бу ҳақда Meduza хабар бермоқда.
Олланднинг таъкидлашича, у ва Германия канцлери Ангела Меркель қочоқларни Европа Иттифоқи мамлакатлари орасида тақсимлаш механизмини ишлаб чиққан. Мазкур механизмга мувофиқ, Олланднинг қайд этишича, Европа Иттифоқи таркибидаги ҳар бир мамлакат кучи етган миқдорда қочоқларни ўз ҳудудида қабул қилиши керак.
Аввалроқ Германия канцлери Ангела Меркель Германия муҳофазага муҳтож барча қочоқлар ёрдам олиши учун барча чораларни кўришини эълон қилганди. Айни вақтда, унинг ҳукумати бошпанага муҳтож бўлмаган муҳожирларни тезроқ депортация қилиш имконини берадиган ўзгартишларни қонунчиликка киритиш бўйича келишиб олганини маълум қилганди.
Бундан ташқари, Меркелнинг қўшимча қилишича, Германиядан бошпана сўраганлар учун пул тўловлари камайтирилади, ўз навбатида, уларга турли имтиёзлар тақдим этилади. Умуман олганда, Германия ҳукумати яқин вақт ичида қочоқларни қабул қилиш учун олти миллиард евро юборишни режалаштирмоқда.
Изоҳ (0)