Қутқарувчилар Жанубий Корея соҳиллари яқинида чўкиб кетган балиқчилик кемасининг яна икки аъзоси жасадини топди. Шундай қилиб, «ТАСС» хабарига кўра, қурбонларнинг умумий сони 10 кишига етди, бир неча киши бедарак йўқолган деб гумон қилинмоқда.
Ағдарилган кема тонгда Чужадо ороли яқинидан топилди. Соҳил қўриқлаш хизматининг аниқлаштирилган маълумотларига кўра, кема бортида 13 нафардан 22 нафаргача одам бўлган бўлиши мумкин. Қутқарувчилар уч кишини қутқариб қолган, улар касалхонага ётқизилган.
Омон қолганларнинг сўзларига кўра, ҳодиса вақтида кучли зарба овози эшитилган, кема двигатели ўчиб қолган, ичига эса сув киришни бошлаган. Шундан сўнг, кема капитани ҳамма сувга сакрашни буюрган, орадан бироз вақт ўтиб кучли тўлқинлар кемани ағдариб ташлаган.
Жанубий Корея денгизчилик ва балиқ хўжалиги вазирлиги мазкур ҳодиса муносабати билан Сежон шаҳрида инқироз штабини ташкил этган. Ҳозирги вақтда ҳалокат жойида қидирув-қутқарув операцияси давом этмоқда, унга соҳил қўриқлаш хизматининг ўнлаб катерлари, ҳарбий-денгиз кучлари кемалари жалб этилган.
Изоҳ (0)