Англияда герцог Веллингтон Наполеонга қарши Ватерлоо жангида минган отга тегишли ёлнинг бир тутами кимошди савдосига қўйилди. Бу ҳақда «РИА Новости» хабар бермоқда.
Ўлганига қарийб 200 йил бўлган Копенгаген лақабли от ёлининг бир тутами Девон графлигида жойлашган Касл-Хилл қасридаги катта тозалаш ишлари вақтида оилавий қоғозлар орасидан чиққан.
«Ватерлоо жангида Копенгаген 17 соат давомида герцог Веллингтонни олиб юрган, жанг давомида герцог бирорта ҳам жароҳат олмаган. Шундан сўнг от герцогнинг оилавий мулкига жўнатилган. Отнинг қабри устига мармар ёдгорлик ўрнатилган», — дейилади аукцион ташкилотчиларининг хабарида.
Лотнинг бошланғич нархи 5 минг фунтга тенг, унинг ҳақиқийлиги касл-хиллик лорд Фортескью томонидан 1836 йилда қолдирилган қайднома орқали тасдиқланган. Савдо 26 август, чоршанба куни бўлиши кутилмоқда.
Ватерлоо остонасидаги жанг 1815 йил 18 июнь куни бўлиб ўтган. Ўшанда Наполеоннинг 72 минг кишилик қўшинига фельдмаршал Веллингтон бошчилигида иттифоқчиларнинг 130 минг кишилик армияси қарши чиққан. Жангда мағлуб бўлган Наполеон Авлиё Елена оролига сургун қилинган ва шу ерда вафот этган.
Изоҳ (0)