«Биг-Бен» минора соати етти сонияга илгарилаб кетди

Лондондаги Вестминстер саройи соатининг қўнғироқ овози сўнгги икки ҳафта ичида 6—7 сонияга илгарилаб кетди, дея хабар бермоқда Meduza.

Минора соати одатда янги соат киришидан 27 сония аввалроқ бонг уради, бироқ сўнгги пайтда бу тахминан 35 сония олдинроқ рўй берди.

Ушбу хатолик ҳақида BBC Radio 4 радиостанцияси ходимларининг кузатувлари орқали маълум бўлди. Улар соат сигнали роппа-роса 18:00 да тугайдиган радиоэшиттиришнинг якунланиш вақти билан мос тушмаётганини сезган.

Радиостанция бу ҳақда минора соатининг ишлаши учун жавобгар мутахассисларга маълум қилди, улар соатнинг юришини тўғрилаш ишларини бошлаб юборди.

Нашр таъкидлашича, Вестминстер саройидаги соат ва у жойлашган минора кўпинча янглиш равишда «Биг-Бен» деб аталади, аслида эса соат механизмидаги қўнғироқлардан биригина бундай номга эга.