Япониянинг Nikkei медиакорпорацияси президенти Pearson компаниясидан FT Group’ни 844 миллион фунт-стерлинг (1,32 миллиард доллар) эвазига сотиб олганидан сўнг, Financial Times газетасининг таҳририят сиёсатини ҳурмат қилишга ваъда берди. Бу ҳақда «RBC.ru» хабар бермоқда.
Япониянинг энг йирик медиахолдингига 2008 йилдан бери раҳбарлик қилиб келаётган Сунео Китанинг сўзларига кўра, «FT’нинг фалсафаси ва қадриятлари Nikkei’ники билан бир хил».
24 июль, жума куни Токиода бўлиб ўтган матбуот анжумани вақтида Кита FT’нинг «таҳририят сиёсати сақлаб қолинишини» маълум қилди. «FT FT’лигича қолади — уни алмаштириб бўлмайди», — деди у.
FT маълумотларига кўра, Nikkei газета нуфузини янада ошириш мақсадида унга инвестиция киритишни режалаштирмоқда. Китанинг сўзларига кўра, корпорация FT’ни «янада кучли» қилмоқчи. Унинг қўшимча қилишича, у нашр бош муҳаррири Лаёнел Барберга тўлиқ ишонади.
Pearson компанияси FT Group’ни Nikkei медиагуруҳига сотишга рози бўлгани ҳақида куни кеча маълум бўлганди. Financial Times газетаси ва The Economist журнали FT Group’нинг асосий активлари ҳисобланади.
Изоҳ (0)