Хитойнинг Zhuoda Group компанияси 3D-принтерда чоп этилган модуллар асосида икки қаватли уй қурди. «Popmech.ru» хабарига кўра, мазкур бино 9,0 магнитудали зилзилага ҳам чидамли.
Уй 3D-принтерда чоп этилган олти панелдан иборат — мазкур панеллар қурилиш майдонига олиб келиниб, кран ёрдамида меҳмонхона, ётоқхона, ошхона ва ваннахонадан иборат ягона конструкцияга айлантирилди. Бинони «қуриш» учун атиги уч соат вақт сарфланди.
Хитойликларнинг сўзларига кўра, умумий майдони 500 квадрат метр бўлган тўлақонли уйни биргина 3D-принтер ёрдамида чоп этиб, 15 кунда йиғиб, битказиш мумкин. Муҳандисларнинг ҳисоб-китобига кўра, мазкур конструкция ҳар қандай об-ҳаво шароитида камида 150 йил хизмат кўрсата олади.
Модулларни чоп этишда фойдаланилган хомашёлар рўйхати ошкор этилмаяпти — рўйхатда цемент йўқлиги маълум, холос. Конструкция учун 22 дан ортиқ патент олинган. Уй томи оловга чидамли ва сув ўтказмас материалдан тайёрланган, ички пардоз элементлари ҳам қисман 3D-принтерда чиқарилган.
Изоҳ (0)