Лондон шаҳрида ўтказилган «Катта дубулға» туркумига кирувчи «Уимблдон» турнирининг аёллар ўртасидаги мусобақа ғолибаси аниқланди, деб хабар беради «Olamsport.com».
Ҳал қилувчи учрашувга сайёрамизнинг биринчи рақамли теннис маликаси америкалик Серена Уильямс ҳамда испаниялик Гарбин Мугурусалар етиб келди.
Бу икки теннисчи шу пайтгача ўзаро уч маротаба тўқнаш келганди. Икки учрашувда Серенанинг қўли баланд келган бўлса, бир баҳсда Мугуруса зафар қучганди. Ўзаро тўртинчи учрашувда Серена яна ғалаба қозонди. Бир соату 22 дақиқа давом этган финал баҳсида Уильямсларнинг кичиги ўзидан 12 ёш кичик рақибасини 6:4, 6:4 ҳисобида таслим этди.
Шу тариқа, Серена Уильямс жорий мавсумдаги кетма-кет учинчи «Катта дубулға» турнирида бош мукофотга эга чиқди. Бу унинг фаолиятидаги ушбу тоифадаги турнирдаги 21-титули бўлди. «Уимблдон»даги ғалаба Серенага 1 миллион 880 минг фунт стерлинг мукофот пули ҳамда 2000 рейтинг очкосини тақдим этди.
«РБК» берган хабарга кўра, америкалик теннисчи «Катта дубулға» туркумига кирувчи турнирларда ғалаба қозонган энг кекса теннисчи аёлга айланди. Финал куни у 33 ёшу 288 кунлик эди. Бундан аввалги рекорд яна бир америкалик теннисчи Мартина Навратиловага тегишли эди. Мартина 1990 йилда «Уимблдон»да ғалаба қозонган кунида 33 ёшу 263 кунлик эди.
Изоҳ (0)