Хабарингиз бор, супероғир вазн тоифасининг WBA (Regular) версияси камари соҳиби ўзбекистонлик Руслан Чагаев бугун Германиянинг Магдебург шаҳрида асли италиялик бўлган, Германия шарафини ҳимоя қиладиган Франческо Пьянетага қарши рингга тушди ва рақибига умуман имконият қолдирмаган ҳолда, 1-раунддаёқ уни аввалига нокдаун, кейин эса нокаутга учратди, деб хабар қилади «Uff.uz».
Ушбу жангни кўпчилик қатори футбол бўйича Ўзбекистон миллий терма жамоаси ва Москванинг «Локомотив» клуби ҳимоячиси Виталий Денисов ҳам кузатиб борди. Виталий жанг давомида Руслан Чагаевга мухлислик қилиб Twitter орқали турли фикрлар қолдирган. Аввалига у «Чагаев, Бокс, фақат ғалаба» дея ёзган бўлса, жанг бошланиб, Чагаев рақибини нокдаунга учратгач: «Ажойиб зарба! Энди охиригача олиб бориш керак», дея кўтаринки фикр билдирди.
Жанг Руслан Чагаевнинг ғалабаси билан якунига етгач, Виталий Денисов ҳаммани табриклаб ўтди.
«Бошга берилган кучли зарба ва якунда Руслан Чагаев ғолибликка эришди!!! Ҳаммани ғалаба билан табриклайман», — дейди Виталий Денисов.
Эслатиб ўтамиз, бу жангда ғолиб бўлиш учун Руслан Чагаевга 2 дақиқа-ю 57 сония кифоя қилди.
Изоҳ (0)