Нью-Йоркда истиқомат қилувчи Сюзанна Мушатт Жонс 116 ёшга тўлди. «Корреспондент.net»нинг хабар беришича, Жонс ҳозирги вақтда ҳаёт бўлган кишилар орасида жаҳоннинг энг кекса одами ҳисобланади.
Сюзанна 1899 йил 6 июль куни туғилган бўлиб, 2015 йил 17 июнь куни — 115 ёшу 346 кунлигида Гиннеснинг рекордлар китобидан ўрин олган.
Кекса аёл узоқ умр кўришига барқарор уйқу сабаб бўлганини таъкидлайди. У кўриш қобилиятини йўқотган ва деярли эшитмайди, бироқ имкон қадар фаол турмуш тарзини олиб боришга интилади.
Сюзанна ўн йил аввал Housing Authority нашрига интервью бериб, шундай деганди: «Мен ҳеч қачон чекмаганман ва спиртли ичимлик ичмаганман. Атрофимни муҳаббат ва ижобий энергияга тўлдираман, айнан шу нарса узоқ ва бахтли ҳаёт калитидир».
Жонснинг оиласи катта, уни эркалаб «Ти» (инглиз тилидаги «auntie» – «холажон») деб чақиришади. Сюзаннанинг 100 нафар жияни бор.
Изоҳ (0)