Греция томонининг ташаббуси билан 6 июль, душанба куни Россия президенти Владимир Путин ва Греция бош вазири Алексис Ципрас ўртасида телефон суҳбати бўлиб ўтди. Бу ҳақда «Ведомости» хабар бермоқда.
«Суҳбат давомида халқаро кредиторларнинг Афинага молиявий ёрдам кўрсатиш шартлари бўйича Грецияда бўлиб ўтган референдум якунлари, шунингдек, Россия-Греция ҳамкорлигининг баъзи масалалари муҳокама қилинди», — дейилади Кремль матбуот хизмати хабарида.
Қайд этишларича, Путин Греция олдида турган қийинчиликларни енгиб ўтишда грек халқини қўллаб-қувватлашини билдирган.
Аввалроқ Reuters агентлиги грек ҳукуматидаги манбага асосланиб, Ципрас Афинада давом этаётган музокаралардаги танаффус вақтида Путинга қўнғироқ қилаётгани ҳақида хабар берганди. Ўз навбатида, Кремлдаги манба «ҳақиқатан ҳам шундай суҳбат режалаштирилгани»ни тасдиқлаган.
Грецияда 5 июль куни қарздорликни тартибга солиш бўйича халқаро кредиторлар томонидан илгари сурилган таклифни Афина қабул қилиши керакми ёки йўқми, деган масала юзасидан референдум бўлиб ўтди. Плебисцит натижаларига кўра, грекларнинг 61,3 фоизи кредитларнинг шартларига қарши овоз берди, 38,9 фоизи эса бу шартларни қўллаб-қувватлади.
Изоҳ (0)