Москва полицияси махсус бўлинмаси ифторлик учун йиғилган чеченларга ҳужум қилди

Москва полициясининг махсус бўлинмаси ўнлаб чеченистонликлар ифторлик учун йиғилган ресторанда рейд ўтказди. «Echo.msk.ru»нинг хабар беришича, ҳодиса ҳақида ва унинг видеоёзуви Чеченистон телевидениесида эълон қилинган.

Рейд қачон ўтказилганига аниқлик киритилмаган, бироқ кузатув камералари ёзувида 19 июнь санасини кўриш мумкин. Чеченистон телевидениесининг хабар беришича, шу куни «Веселий Бабай» ресторанига 50 нафарга яқин чеченистонлик йиғилган ва ҳеч қандай ҳуқуқбузарлик амалга оширилмаган.

Шу вақт Москва полициянинг махсус бўлинмаси ресторанга бостириб кириб, ҳаммани ерга ётқизган, телефонларни мусодара қилган, чўнтакларни ағдариб, автомобиль калитларини йиғиб олган. Адвокат Салом Мусаевнинг сўзларига кўра, полициячилар қонунга зид равишда ҳаракат қилган.

Хусусан, қўлга олинганларнинг ҳеч бирига уларнинг ҳуқуқлари ва нима учун ҳибсга олинаётгани тушунтирилмаган, мусодара қилинган мулк рўйхатга олинмаган. Ҳодисанинг бошқа гувоҳлари рейдни «кутилмаган ҳужум», «қўпол муносабат», «очиқчасига таҳқирлаш» деб атаган.

Қўлга олинган чеченистонликлар кечаси туман ички ишлар бўлимига олиб келинган ва тонггача егулик ва сувсиз ушлаб турилган. Уларнинг барчасидан бармоқ излари олинган, уларга қарши ҳеч қандай айблов илгари сурилмаган.

Чеченистон телевидениесининг хабар беришича, мазкур иш Россия президенти ҳузуридаги Чеченистон ваколатхонаси назоратига олинган, маълумотлар эса Тергов қўмитаси, Ички ишлар вазирлигига юборилган.