Москвада «Аэроэкспресс» учун мўлжалланган ва Швейцариянинг Stadler компанияси томонидан ишлаб чиқарилган икки қаватли «ЭШ2» поездлари синовдан ўтказилмоқда. Бу ҳақда «Russos.livejournal.com» хабар бермоқда.
Поездлар Москванинг ҳар учала аэропорти — «Домодедово», «Шереметьево» ва «Внуково»га қатнаши кутилмоқда, бироқ бу поездлардан дастлаб фақат «Домодедово» йўналишида фойдаланилади.
Поездлар икки хил – олти ва тўрт вагонли конфигурацияда етказиб берилади. Эътиборли томони, уларни бир-бирига қўшиб, саккиз, 10 ва 12 вагонли узун ҳаракатланувчи таркибларни шакллантириш мумкин.
Тахминларга кўра, «Внуково» йўналишида олти вагонли, «Шереметьево»га саккиз вагонли, «Домодедово»га эса 10 вагонли икки қаватли поездлар қатнаши кутилмоқда.
Дастлабки келишувга кўра, «Аэроэкспресс» бундай поездларнинг 25 тасини сотиб олишни режалаштирган эди, бироқ рубль курсининг қадрсизланиши натижасида вазият ҳозирча ноаниқ бўлиб турибди. Хусусан, Stadler «Аэроэкспресс» учун тайёрлаган дастлабки тўртта поездни Озарбайжонга сотиб юборди.
Изоҳ (0)