Экологларнинг огоҳлантиришича, 10 йилдан сўнг оқ айиқлар бутунлай қирилиб кетиши мумкин. «Корреспондент.net»нинг АҚШ балиқ ресурслари ва ёввойи табиат хизматига асосланиб хабар беришича, оқ айиқлар популяциясининг камайишига рекорд даражада кўп иссиқхона гази ажралиб чиқаётгани сабаб бўлмоқда.
АҚШ Геология хизмати ҳузуридаги Ёввойи табиатни ўрганиш марказининг 20га яқин экологлари сўнгги 20 йил давомида оқ айиқларнинг сони ва Арктикадаги иқлим ўзгариши жараёнларини кузатиб борди.
Тадқиқот давомида улар воқеаларнинг икки хил ривожини кўриб чиқди. Биринчи ҳолатда иссиқхона газининг ажралиб чиқиши даражасининг жорий кўрсаткичлари сақлаб қолинди, иккинчи ҳолатда эса газ ажралиб чиқишининг кўрсаткичи Киото протоколи доирасида белгиланган мажбуриятлар даражасида пасайтирилди.
Экологларнинг маълумотларига кўра, ҳар иккала ҳисоб-китоблар ҳам кейинги йилларда қутбдаги оқ айиқларнинг сони антропоген таъсирлар ёки озиқ-овқатнинг етмаслигидан эмас, балки иқлим ўзгариши ва у билан боғлиқ ҳолда оқ айиқлар яшайдиган ва егулик топадиган музликлар майдонини қисқариши сабаб камайиб кетади.
Изоҳ (0)