Хитойдаги йирик автоҳалокат оқибатида 11 киши ҳаётдан кўз юмди

Хитойда тезкор автотрассадаги кўприкдан автобуснинг қулаши оқибатида камида 11 киши ҳалок бўлди, яна 17 киши жабрланди. Бу ҳақда маҳаллий маъмурлар маълумоти асосида «РИА Новости» хабар бермоқда.

Автоҳалокат 1 июль, чоршанба куни Хитой шимоли-шарқидаги Цзиань шаҳрида рўй берди. Шимолий Корея билан чегарадаги Даньдун шаҳрига йўл олган автобусда жанубий кореялик 26 киши бўлган, улардан 10 нафари ҳаётдан кўз юмди.

Автобус олтита транспорт воситасидан иборат ва 140 нафар жанубий кореялик амалдорларни ташиётган автокарвон таркибида бўлган. Улар Хитойнинг Иккинчи жаҳон уруши йилларида японларга қарши кураш билан боғлиқ диққатга сазовор жойларини бориб кўриш ниятида эди.