Аҳолига маиший хизматлар кўрсатиш фаолиятини амалга оширувчи якка тартибдаги тадбиркорлар учун қатъий белгиланган солиқ ставкалари ҳамда уларга бериладиган солиқ имтиёзлари бўйича Давлат солиқ қўмитаси маълумот берди.
Ўзбекистон Республикаси Вазирлар Маҳкамасининг 2011 йил 7 январдаги 6-сонли қарори билан тасдиқланган Хусусий тадбиркорлар юридик шахс ташкил этмасдан шуғулланиши мумкин бўлган фаолият турлари рўйхатига асосан якка тартибдаги тадбиркорлар 31 турдаги маиший хизмат фаолиятларини амалга оширишлари мумкин.
Ўзбекистон Республикаси Солиқ кодексининг 375-моддасига асосан солиқ тўловчининг календар ойида ишлаган кунлари сонидан қатъий назар, қатъий белгиланган солиқ тадбиркорлик фаолиятининг тури ва солиқ тўловчининг фаолиятни амалга ошириш жойига қараб белгиланган ставкалар бўйича тўланади.
Якка тартибдаги тадбиркорлар учун қатъий белгиланган солиқ ставкалари Ўзбекистон Республикаси Президентининг 2014 йил 4 декабрдаги «Ўзбекистон Республикасининг 2015 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги ПҚ-2270-сонли қарорининг 12-иловасида белгиланган.
Шунингдек, мазкур қарорга асосан сартарошлик хизматлари, маникюр, педикюр, косметолог хизматлари ва шунга ўхшаш бошқа хизматлар бўйича солиқ ставкалари унификация қилиниб, Тошкент шаҳрида энг кам ойлик иш ҳақининг 3,5 баравари, Нукус шаҳар ва вилоят бўйсунувидаги шаҳарларда 1,5 баравари ҳамда бошқа аҳоли пунктларида 0,5 баравари миқдорида тўланиши белгиланди.
Қатъий белгиланган солиқ ставкалари йил бошига — 2015 йил 1 январига белгиланган энг кам иш ҳақидан (118400 сўм) келиб чиқиб аниқланади ва энг кам иш ҳақи миқдори йил давомида ўзгарганда қайта кўриб чиқилмайди.
Таъкидлаш жоизки, Ўзбекистон Республикаси Президентининг 2012 йил 10 майдаги «2012—2016 йилларда Ўзбекистон Республикасида хизмат кўрсатиш соҳасини ривожлантириш дастури тўғрисида»ги ПҚ-1754-сонли қарорига асосан 2012 йилнинг II чорагидан бошлаб, қишлоқ жойларда якка тартибда уй-жой қурилиши асосида барпо этилаётган массивларда ташкил қилинаётган кирхоналар хизматларини кўрсатадиган якка тартибдаги тадбиркорлар қатъий белгиланган солиқ тўловини тўлашдан 5 йил муддатга озод этилган.
Мазкур қарорда берилган имтиёзлар натижасида маиший хизмат фаолиятини амалга ошириш бўйича давлат рўйхатидан ўтган якка тадбиркорлар сони 2012 йил 1 апрель ҳолатига нисбатан жорий йил 1 июнь ҳолатига 10 фоизга ошган.
Изоҳ (0)