16 июнь куни «Hilol-nashr» нашриёт-матбааси ҳамда «Islom.uz» портали ходимлари иштирокида шайх Муҳаммад Содиқ Муҳаммад Юсуф ҳазратларининг қаламига мансуб янги китобларнинг тақдимот маросим бўлиб ўтди, деб хабар бермоқда «Info.islom.uz».
Анъанага кўра, тадбир Қуръони Карим тиловати билан бошланди. Дуодан сўнг ношир Исмоил Муҳаммад Юсуф сўзга чиқиб, кириб келаётган Рамазони шариф муносабати билан барчани муборакбод этди, сўнгра «Islom.uz» порталида ҳамда «Hilol-nashr» нашриёт-матбаасининг моҳи Рамазонга бағишлаб режалаштирилган ишлари тўғрисида, хусусан, «Мўминнинг қалқони» деб номланган муфассал рўза китоби ҳамда «Бахтиёр оила» китобининг янги нашри тақдим қилинаётгани ҳақида гапирди.
Шундан сўнг сўзга чиққанлар ушбу икки китобнинг ёзилиш тарихи, уларнинг бугунги кундаги диний-маърифий адабиётлар орасида тутган ўрни ҳақида тўхталиб ўтдилар. Тақдимот маросимига ташриф буюрган «Тўхтабой» жоме’ масжиди имом-хатиби Ишоқжон Бегматов ҳамда «Минор» жоме’ масжиди имом-хатиби Раҳматуллоҳ Сайфуддиновлар ҳам сўзга чиқиб, шайхнинг эл-юртимизга, халқимизга ва бутун дунё мусулмонларига кўрсатган фидойиликлари, буюк хизматлари ҳақида тўлқинланиб сўзладилар.
Тақдимот маросимининг азиз меҳмони, севимли адибимиз, Ўзбекистон халқ ёзувчиси Тоҳир Малик шайх ҳазратларининг илмий мероси, у зот асос солган илм-маърифат боғининг мева бераётгани, ҳали бу илм сарчашмаси халқимизга узоқ йиллар манфаат келтириши ҳақида сўзладилар.
Шундан сўнг ушбу тадбир муносабати билан ўқилган хатми Қуръон якунланиб, Абдуллоҳ ҳожи Исмоилов ушбу хатмнинг савобини барча ўтган мўмин-мусулмонларга, хусусан, шайх ҳазратларининг руҳларига бағишлаб, маросимга якун ясаб бердилар.
Тадбир сўнггида шайх Муҳаммад Содиқ Муҳаммад Юсуф ҳазратларининг аввалги йиллардаги Рамазон табриклари намойиш қилинди.
Эслатиб ўтамиз, шайх Муҳаммад Содиқ Муҳаммад Юсуф шу йилнинг 10 март куни ҳаётдан кўз юмган эдилар.
Изоҳ (0)