Ramazon oyi arafasida shayx Muhammad Sodiq Muhammad Yusufning yangi kitoblari taqdimoti bo‘lib o‘tdi
16-iyun kuni “Hilol-nashr” nashriyot-matbaasi hamda “Islom.uz” portali xodimlari ishtirokida shayx Muhammad Sodiq Muhammad Yusuf hazratlarining qalamiga mansub yangi kitoblarning taqdimot marosim bo‘lib o‘tdi, deb xabar bermoqda “Info.islom.uz”.
An’anaga ko‘ra, tadbir Qur’oni Karim tilovati bilan boshlandi. Duodan so‘ng noshir Ismoil Muhammad Yusuf so‘zga chiqib, kirib kelayotgan Ramazoni sharif munosabati bilan barchani muborakbod etdi, so‘ngra “Islom.uz” portalida hamda “Hilol-nashr” nashriyot-matbaasining mohi Ramazonga bag‘ishlab rejalashtirilgan ishlari to‘g‘risida, xususan, “Mo‘minning qalqoni” deb nomlangan mufassal ro‘za kitobi hamda “Baxtiyor oila” kitobining yangi nashri taqdim qilinayotgani haqida gapirdi.
Shundan so‘ng so‘zga chiqqanlar ushbu ikki kitobning yozilish tarixi, ularning bugungi kundagi diniy-ma’rifiy adabiyotlar orasida tutgan o‘rni haqida to‘xtalib o‘tdilar. Taqdimot marosimiga tashrif buyurgan “To‘xtaboy” jome’ masjidi imom-xatibi Ishoqjon Begmatov hamda “Minor” jome’ masjidi imom-xatibi Rahmatulloh Sayfuddinovlar ham so‘zga chiqib, shayxning el-yurtimizga, xalqimizga va butun dunyo musulmonlariga ko‘rsatgan fidoyiliklari, buyuk xizmatlari haqida to‘lqinlanib so‘zladilar.
Taqdimot marosimining aziz mehmoni, sevimli adibimiz, O‘zbekiston xalq yozuvchisi Tohir Malik shayx hazratlarining ilmiy merosi, u zot asos solgan ilm-ma’rifat bog‘ining meva berayotgani, hali bu ilm sarchashmasi xalqimizga uzoq yillar manfaat keltirishi haqida so‘zladilar.
Shundan so‘ng ushbu tadbir munosabati bilan o‘qilgan xatmi Qur’on yakunlanib, Abdulloh hoji Ismoilov ushbu xatmning savobini barcha o‘tgan mo‘min-musulmonlarga, xususan, shayx hazratlarining ruhlariga bag‘ishlab, marosimga yakun yasab berdilar.
Tadbir so‘nggida shayx Muhammad Sodiq Muhammad Yusuf hazratlarining avvalgi yillardagi Ramazon tabriklari namoyish qilindi.
Eslatib o‘tamiz, shayx Muhammad Sodiq Muhammad Yusuf shu yilning 10-mart kuni hayotdan ko‘z yumgan edilar.
