Бермуд учбурчаги 90 йил аввал йўқолган кемани қайтаргани ҳақидаги хабар ёлғон бўлиб чиқди

Бермуд учбурчаги бундан 90 йил аввал бедарак йўқолган Американинг SS Cotopaxi юк кемасини «қайтариб бергани» ҳақидаги хабар ёлғон бўлиб чиқди. TJ’нинг хабар беришича, бу ҳақдаги маълумот дастлаб ҳазиломуз хабарларни тарқатиши билан танилган World News Daily (WND) томонидан берилган.

WND мазкур хабарни 18 майда ёзган, бироқ МДҲнинг етакчи сайтлари ва нашрлари бунга фақат 13 июнга келиб эътибор қаратган. WND’нинг кириш қисмида унинг материаллари ҳазиломуз эканлиги очиқ билдирилган бўлса-да, бундан аввал ҳам сайт томонидан тайёрланган бир қатор ёлғон хабарлар, жумладан, SS зобитини ютиб юборган лаққа балиқ ва Мерилин Монрони ўлдирган МРБнинг собиқ агенти ҳақидаги материаллар кенг жамоатчиликни қарийб ишонтирганди.

WND кема ҳақидаги ўз хабарида кубалик эксперт Родолфо Салвадор Крузга асосланган – сайт ходимлари унинг суратини Британия газеталарининг биридан топган. Тўлқинлар орасида дайдиб сузаётган SS Cotopaxi’нинг сурати эса «фотошоп» бўлиб чиққан. Кема фотосурати 1977 йилда суратга олинган «Учинчи даражали яқин алоқалар» фантастик фильмидан олинган.

Clinchfield Navigation компаниясининг SS Cotopaxi юк кемаси ҳақиқатан ҳам мавжуд бўлган. У 1925 йил декабрида, Жанубий Каролинанинг Чарлстон портидан Кубанинг Гавана шаҳрига сузиб кетаётганида бедарак йўқолган. Кема бортида 32 киши бўлган.