Россия армияси 29 июлга ўтар кечаси Украинанинг Запорожье вилоятидаги ахлоқ тузатиш колониясига авиабомба ташлади. Бу ҳақда вилоят администрацияси раҳбари Иван Федоров хабар берди.
Федоровнинг сўзларига кўра, Запорожье дастлаб 8 та ФАБ авиация бомбаси билан ўққа тутган. Авиазарбалардан бири ахлоқ тузатиш колониясига қаратилган.
16 киши ҳалок бўлди, 35 киши жароҳат олди. Жабрланганларга барча зарур тиббий ёрдам кўрсатилмоқда, деди украиналик мулозим.
Ҳужум оқибатида бинолар вайрон бўлган, шунингдек, атрофдаги хусусий уйларга ҳам зарар етган. Украина президенти офиси раҳбари Андрей Ермак ҳужумга муносабат билдириб, бу Россиянинг навбатдаги “ҳарбий жинояти” эканини ва агар “русларни тўхтатмаса, ҳаракатлар давом этиши”ни таъкидлаган.
Айрим шахслар орқали АҚШга таҳдид солаётган Путин режими иқтисодий ва ҳарбий зарбаларга дучор бўлиши керак. Бу уни уруш олиб бориш имкониятидан маҳрум қилади. Путин ҳарбий-саноат мажмуасини кенгайтираётган ва КХДРни урушга жалб қилишга қодир экан, Европада уруш хавфи ҳақиқатан ҳам мавжуд, деган Ермак.
Россия ҳарбийлари Запорожье вилояти ва вилоят марказини мунтазам равишда ўққа тутиб келмоқда. Бунинг учун улар дронлар, ракеталар ва бошқариладиган авиация бомбаларини қўлламоқда. Масалан, 26 июлга ўтар кечаси вилоят дронлар ҳужумига учраганди. Оқибатда бир нечта ёнғин содир бўлган, хусусий уй вайрон бўлган ва фермер хўжалигининг омборига зарар етганди. Украинага кенг кўламли бостириб киришдан сўнг, Россия қўшинлари Запорожье вилояти ҳудудининг бир қисмини эгаллаб олганди.
Изоҳ (0)