Тошкент Ахборот технологиялари университетининг Қарши филиалида тўртинчи босқичда ўқиётган йигит талаба бўлиш орзусида юрган ёшларни «ўқишга киритиб қўяман», деб алдаб, мўмай даромад топишни мақсад қилди, деб хабар беради «Ҳуқуқ» газетаси.
Икки йил давомида ТАТУ Қарши филиалига кира олмаган абитуриентнинг онаси танишлари орқали ўқишга киритиб қўядиган «ҳожатбарор» ҳақида эшитди ва ёрдам сўраш учун унинг олдига келди.
Фирибгар талаба аёлга ўғлини ўқишга киритишнинг бошқа йўллари борлигини билдириб, фарзанди қўшимча шартнома асосида ўқишга киришга рози ёки норози эканлигини сўрайди. Бу таклиф аёлга гўёки ўғли талабаликка қабул қилингандек таъсир кўрсатди. Ўзгалар ишончидан фойдаланиб, мўмай пул топиш иштиёқи фирибгарга тинчлик бермади. Шунинг учун ҳам вазиятни қўлдан бой бермай, қўшимча шартнома асосида ўқишга киритиш эвазига 4500 АҚШ доллари сўрайди. 2014 йилнинг 12 ноябрида аёл сўралган пулни беради.
Талаба табиийки сўзининг устидан чиқа олмади. Аёл эса ўғли талабаликка қабул қилинавермагач, фирибгарнинг тузоғига илинганини англади. Ҳар гал пулни қайтаришни сўраб борганида, йигит турли баҳоналарни рўкач қилишдан нарига ўтмасди. Шундан сўнг жабрдийда аёл унинг хатти-ҳаракатлари устидан ҳуқуқни муҳофаза қилувчи органларга мурожаат қилишга мажбур бўлди.
Жиноят ишлари бўйича Қарши шаҳар суди талабага фирибгарлик жинояти учун 3 йил-у 3 ой муддатга озодликдан маҳрум қилиш жазосини тайинлади.
Изоҳ (0)