Саудия Арабистонининг “Ан-Насср” клуби “Челси” чап қанот ҳимоячиси Марк Кукурельяга қизиқиш билдирмоқда. Бу ҳақда Marca нашри хабар берди.
Манбага кўра, риёдликлар Лондон клубига расмий таклиф юборишга тайёргарлик кўрмоқда. Гарчи келишув тафсилотлари ҳозирча ошкор қилинмаган бўлса-да, “Ан-Насср” томонидан таклиф этиладиган сумма “рад этиб бўлмайдиган” даражада катта бўлиши кутилмоқда.
Шунга қарамай, футболчининг ўзи ҳозирча Англия Премьер Лигасида фаолиятини давом эттириш тарафдори экани айтилмоқда. Бироқ саудияликлар унга жамоанинг асосий ўйинчиларидан бири мақомини ваъда қилмоқда. Бундан ташқари, “Челси” бош мураббийи Энсо Мареска испаниялик ҳимоячини ўз тактикасининг муҳим қисмларидан бири сифатида кўрмоқда. Шу сабабли лондонликлар ҳозирча Кукурельяни қўйиб юборишга шошилмаяпти.
Маълумот учун, “Ан-Насср” айни пайтда яна бир юлдуз футболчи — Жоау Феликсни жамоага қўшиб олиш бўйича музокаралар олиб бормоқда. Инглиз нашрларига кўра, томонлар келишувга эришган ва яқин кунларда бу трансфер расман эълон қилиниши кутилмоқда.
“Ан-Насср” жорий мавсум Саудия Про Лигасини 3-ўринда якунлади. Клуб чемпион “Ал-Иттиҳод”дан 13 очко ортда қолди.
Изоҳ (0)