Ўзбекистонда 2025 йил август ойи қуруқ ва бир оз иссиқ об-ҳаво билан бошланади.
“Ўзгидромет” прогнозларига кўра, ойнинг катта қисмида ҳарорат асосан кундузи 34-37 даража атрофида, жанубда баъзи жойларда 40-41 даражагача бўлади. Қайд этилишича, бундай ҳарорат ёз фасли учун жуда қулай бўлиб, у август ойидаги ўртача йиллик қийматларга яқиндир.
Кечалари ҳарорат асосан 18-23 даража бўлади. Учинчи ўн кунликда ҳарорат кечалари аста-секин 13-18 даражагача, кундуз кунлари 30-35 даражагача, жанубда 36-38 даражагача пасаяди.
Август ойи асосан қуруқ бўлиши кутилмоқда. Республика ҳудудининг катта қисмида ой давомида ёмғир ёғиши эҳтимоли кам.
Ўзбекистонда август ойи одатда қандай кечган?
Ўзбекистон ҳудуди бўйича август ойининг ўртача ойлик ҳарорати июль ойига нисбатан 1,5-2,5 даражага паст бўлади. Аммо шунга қарамай, август ҳали ҳам жуда иссиқ ой ҳисобланади. Метеорологик кузатувларнинг барча даври учун 2021 йилнинг август ойи энг илиқ, 1912 йилнинг август ойи эса энг совуқ бўлган. Ҳудуднинг катта қисмида ўртача максимал ҳарорат 35-37 даражани, жанубда ва чўл ҳудудларда 38-40 даражани ташкил этади.
Мамлакат ҳудудининг катта қисмида август ойида ҳаво ҳарорати бирор марта ҳам 40,0 даражадан кўтарилмаган, фақат жанубда ва чўл ҳудудларда айрим кунларда ҳаво 41-42 даражагача исиган йиллар ҳам кузатилган. Сўнгги 10 йил ичида бундай август ойлари 2020 ва 2022 йилларда қайд этилган.
Ўзбекистонда август йилнинг энг қуруқ ойи ҳисобланади. Ёмғир жуда камдан кам ҳолларда, текислик ҳудудларнинг катта қисмида ўртача 1 кундан 3 кунгача бир оз ёғади ва ўртача ойлик ёғингарчилик миқдори 1-2 мм дан, Фарғона водийсида 3-5 мм дан кўп бўлмайди. Тоғолди ва тоғли ҳудудларда ёмғир тез-тез ёғади.
Изоҳ (0)