Перулик футбол ҳаками 5 дақиқа ичида беш кишини майдондан четлатди

Футбол бўйича Перу чемпионатининг 5-туридаги «Альянса Лима» — «Реал Гарсиласо» ўйинида бош ҳакам Рамон Бланко мезбонларнинг 5 вакилига қизил карточка кўрсатди, деб хабар қилади «Championat.com».

86-дақиқада Габриэль Коста четлатилди, ҳакам билан тортишгани учун пойтахт жамоаси устози Гильермо Сангинетти ҳам майдондан ҳайдалди. Учрашувнинг қолган вақтида «Альянса»нинг яна уч футболчиси ўз қаршисида қизил карточка кўрди. Беллашув меҳмонларнинг 1:0 ҳисобидаги ғалабаси билан якунланди.

Ҳакамлик иши трибунадаги мухлислар ўртасида тартибсизликлар келиб чиқишига сабаб бўлди. Рефери полициячилар ҳамроҳлигида стадионни тарк этди.

Перу профессионал ҳакамлар ассоциацияси Рамон Бланконинг ишини юқори баҳолади ва уни Facebook’даги саҳифасида табриклади.