Тошкентда футбол бўйича ёшлар ўртасидаги 2015 йилги жаҳон чемпионатида иштирок этадиган Ўзбекистон ёшлар терма жамоаси бош мураббийи Равшан Ҳайдаров ҳамда жамоа сардори Жавоҳир Соҳибов иштирокида матбуот анжумани бўлиб ўтди. Бу ҳақда ЎФФ матбуот хизмати хабар бермоқда.
30 май куни Янги Зеландияда футбол бўйича ёшлар ўртасидаги 2015 йилги жаҳон чемпионати старт олади. Унда Ўзбекистон ёшлар терма жамоаси “F” гуруҳида Германия, Фижи ва Гондурас терма жамоаларига қарши баҳс олиб боради. Терма жамоа ЖЧ-2015га тайёргарликни декабрь ойида бошлаб, беш ойда олтита йиғин, 14та ўртоқлик учрашуви ўтказди
«Тайёргарлик жараёнидан кўнглим тўлди. Ўзимиздан катта ёшдаги бир нечта терма жамоалар билан, шунингек тенгдош жамоалардан Уругвай, Португалия каби кучли термалар билан назорат ўйинларида майдонга тушдик. Гуруҳ босқичидаги рақибларни яхши ўрганиб чиқдик, деб айта оламан. Улар иштирокидаги ўйинларнинг видеолари бизда бор эди. Диққат билан ўрганиб, таҳлил қилиб чиқдик ва шунга яраша тайёргарликларни олиб бордик», - деди Равшан Ҳайдаров.
Терма жамоа мураббийлари йиғинлар давомида 40дан ортиқ футболчиларни кўздан кечирди. Ҳайдаровнинг қайд этишича, Жамшид Болтабоевнинг жароҳат олгани таркиб учун энг катта йўқотиш бўлди. Россиянинг «Рубин» клубидан тўп сураётган ўзбекистонлик Бобур Давлатов эса, клуби рухсат бермагани учун, ЖЧ-2015га бормайдиган бўлди.
«20 май куни Янги Зеландияга йўл оламиз. У ерга «Тошкент – Дубай – Сидней – Веллингтон» йўналишида учамиз. Умумий ҳисобда 22 соат парвоз қилишимиз керак бўлади. Янги Зеландия иқлимига мослашиш, узоқ парвоздан кейин тикланиш ҳамда битта ўртоқлик учрашуви (Панамага қарши) ўтказиш учун у ерга эртароқ боряпмиз. Бунинг учун ЎФФга миннатдорчилигимни билдираман», - деди мураббий.
Равшан Ҳайдаровнинг алоҳида қайд этишича, Ўзбекистон ёшлар терма жамоаси олдига ярим финалга чиқиш вазифаси қўйилган. «Биз энг камида аввалги мундиалларда қайд этилган натижани такрорлашимиз зарур», - дейди Ўзбекистон U-20 бош мураббийи Равшан Ҳайдаров.
Изоҳ (0)