Ўзбекистонда ташқи интернет-канал сиғими секундига 19 гигабитдан ошди

Ўзбекистонда халқаро ахборот тармоқларидан фойдаланиш умумий тезлиги март ойи охирига келиб 2015 йил бошига нисбатан 17 фоизга ўсди ва 19,25 Гбит/с ни ташкил қилди, дея хабар бермоқда «Газета.uz».

Бу ҳақда Ўзбекистон Ахборот технологиялари ва коммуникацияларини ривожлантириш вазирлигининг 2015 йил биринчи чорак якунлари бўйича 1 май куни бўлиб ўтган Ҳайъат мажлисида маълум қилинган.

Маълумот учун, Ўзбекистонда 2014 йил давомида ташқи интернет-канал сиғими қарийб 62 фоизга – 10,3 Гбит/с дан 16,64 Гбит/с гача ошган эди.

Халқаро пакетли коммутация маркази орқали мамлакатнинг барча провайдерларига интернет хизматини тақдим этувчи «Ўзбектелеком» компанияси 2014 йил бошида, талабдан келиб чиқиб, ташқи интернет каналлари тезлигини тўрт баробар ошириши мумкинлигини маълум қилганди.