Қозоғистондаги навбатдан ташқари президент сайловида ғолиб чиққан Нурсултон Назарбоевнинг инаугурацияси 29 апрель куни бўлиб ўтади. Бу ҳақда «РИА Новости» хабар бермоқда.
«1995 йил 26 декабрда қабул қилинган «Қозоғистон Республикаси президенти тўғрисида»ги konstitutsiyaviy қонуннинг 2-моддаси 3-бандига мувофиқ, Марказий сайлов комиссияси (МСК) 2015 йил 29 апрелни навбатдан ташқари президент сайловида ғолиб чиққан Нурсултон Абишевич Назарбоевнинг қасамёд қабул қилиш куни сифатида белгилаш ҳақида қарор қабул қилади», - деди МСК котиби Бахит Мелдешов.
МСК аъзолари томонидан маъқулланган қарорга асосан, Нурсултон Назарбоев Қозоғистон президенти сифатида рўйхатга олинади. 29 апрель куни эса Назарбоевга унинг Қозоғистон президенти эканлиги ҳақидаги тегишли гувоҳнома топширилади.
Эслатиб ўтамиз, 26 апрель, якшанба куни Қозоғистонда навбатдан ташқари президент сайлови бўлиб ўтди. Унда уч номзод – амалдаги президент Нурсултон Назарбоев, Коммунистик халқ партияси раҳбари Турғун Сиздиков ва Касаба уюшмалари федерацияси раиси Абелғази Кусаинов президентлик учун курашди.
Овоз бериш жараёнида рекорд даражада кўп – сайловчиларнинг 95,21 фоизи иштирок этди. МСКнинг якуний маълумотларига кўра, сайловчиларнинг 97,75 фоизи Нурсултон Назарбоев номзодига овоз берган.
Изоҳ (0)