Судандаги президентлик сайловларида амалдаги президент Умар ал-Башир ғолиб бўлди

Суданнинг амалдаги президенти Умар ал-Башир янги беш йиллик муддатга қайта сайланди, деб хабар бермоқда ТАСС.

Мамлакатнинг Олий сайлов комиссияси ал-Баширнинг мутлақ ғалабаси ҳақида 27 апрель куни маҳаллий телевидение орқали жонли эфирда маълум қилди. Маълумотларга кўра, мамлакат раҳбарига сайловчиларнинг 94,5 фоизи (5,25 миллион киши) овоз берган.

Дарфур штатидаги низолар сабаб Халқаро жиноий суд томонидан инсониятга қарши жиноятларда айбланаётган 71 ёшли ал-Башир 1989 йил 30 июнидан бери давлат раҳбари лавозимини эгаллаб келмоқда. У 1996, 2000 ва 2010 йилларда ҳам президент сифатида сайланганди.

Президентлик ва парламентлик сайловлари – 2011 йили мамлакат таркибидан Жанубий Судан ажралиб чиқиб, ўз мустақиллигини эълон қилганидан бери Суданда ўтказилаётган илк сайловлардир.