Канадалик таниқли хонанда Жастин Бибер қўриқчилар билан муштлашганидан сўнг Калифорниядаги машҳур Coachella мусиқий фестивалидан ҳайдалди. Бу ҳақда ТАСС хабар бермоқда.
Ҳодиса ўтган якшанба куни, Бибер рэпер Дрейк куйлаётган залга киришга уринган вақтда содир бўлган. Фестивальнинг қўриқлаш хизмати ходимлари залда бўш ўринлар қолмагани сабаб, Жастин Биберни ичкарига киритмаган.
Бибер эса «оломон ичида туриш ўзи учун хавфсиз эмаслиги»ни рўкач қилиб, залга киритишлари ҳамда қўшимча ўрин билан таъминлашларини талаб қилаверган.
Хонандага ёрдамга келган фестиваль ходимларидан бири уни олиб кириб кетмоқчи бўлганида, қўриқчи Бибернинг йўлини тўсиб, унга нисбатан жанговар усул ишлатган.
Натижада катта можаро келиб чиққан ва 21 ёшли Бибер фестивални тарк этишга мажбур бўлган. Хабар беришларича, ҳозирги вақтда хонанда ўзига нисбатан куч ишлатган қўриқчиларни судга бериш ҳаракатида.
Маълумот учун, 1999 йилдан бери ўтказиб келинадиган Coachella мусиқий фестивали Калифорниядаги энг машҳур ва халқаро даражада юқори мақомга эга фестиваль ҳисобланади. 2014 йили фестиваль доирасида 580 мингта чипта сотилган, 78 миллион доллардан ортиқ даромад олинган.
Изоҳ (0)