Тошкентда Samsung Galaxy S6 600 минг сўмга арзонлашиб, 2,6 млн сўмдан сотила бошлади

Ўтган ҳафта ичида Samsung Galaxy S6 смартфонининг Ўзбекистондаги чакана нархи 600 минг сўмга тушиб кетди, дея хабар бермоқда «Mobinfo.uz».

Смартфон Тошкентда март охирида 3,2 миллион сўмдан (32 Гб хотирали версияси) сотувга чиққан бўлса, 5 апрель кунига келиб, уни 2,6 миллион сўмга харид қилиш мумкин бўлди.

Пойтахтдаги «Флешка» савдо маркази сотувчилари сўзларига кўра, Galaxy S6’нинг арзонлашуви бозордаги таклифлар сонининг ошиши билан боғлиқ. Яқин вақтлар ичида қурилма нархи яна бир неча юз минг сўмга пасайиши мумкин ва шундан сўнг маълум бир қийматда барқарор сотила бошлайди.

Samsung компаниясининг янги флагман смартфони — Galaxy S6 март ойи бошида Барселонадаги MWC 2015 кўргазмаси доирасида тақдим этилган эди.

Смартфон 8 ядроли Exynos 7429 процессори, 5,1 дюймли ва 2560×1440 пикселли Super AMOLED-дисплей, 16 мегапикселли асосий ва 5 мегапикселли олд камера, 3 Гб тезкор ва 32/64/128 Гб ички хотира, 2550 мА/с сиғимли аккумуляторга эга.

Қурилма Android 5.0 операцион тизимида ишлайди.