Тошкентда Ўзбекистон ва Германия ўртасидаги парламентлараро муносабатлар муҳокама қилинди

Ўзбекистон Республикаси Олий Мажлиси Қонунчилик палатасида «Ўзбекистон билан Германия ўртасида парламентлараро муносабатларни мустаҳкамлаш ва ривожлантириш» мавзусида давра суҳбати бўлиб ўтди, дея хабар бермоқда Палата матбуот хизмати.

Қонунчилик палатаси ҳамда К.Аденауэр номидаги жамғарма ҳамкорлигида ташкил этилган ушбу тадбирда Ўзбекистон ва Германия парламентлари аъзолари, халқаро ва маҳаллий экспертлар, оммавий ахборот воситалари вакиллари иштирок этди.

Давра суҳбатида ҳар томонлама ва ўзаро манфаатли ҳамкорликни янада ривожлантириш, парламентлараро муносабатларни мустаҳкамлаш масалалари муҳокама қилинди. Парламент амалиёти борасида тажриба алмашилди.

Германиялик ҳамкасблар, хусусан, Тюренгия ери парламенти депутатлари Майк Моринг ва Эвелин Гросс Германиянинг парламентлараро алоқаларни амалга ошириш, қонун ижодкорлиги ва назорат-таҳлил фаолиятини ривожлантириш бўйича тажрибасига оид маърузалар билан қатнашди. Улар Ўзбекистонда демократик ўзгаришларга, жумладан, ўтган парламент ва Президент сайловларига юқори баҳо берди.

Тадбирда қонунчилик иши сифатини, парламент назорати самарадорлигини, сиёсий партиялар фракциялари ролини янада ошириш борасидаги ислоҳотлар парламентнинг давлат ҳокимияти органлари тизимида тутган ўрнини сезиларли даражада мустаҳкамлагани таъкидланди.

Парламент фаолияти самарадорлигини оширишда парламентлараро ҳамкорликни мустаҳкамлаш, хорижий ҳамкасблар билан тажриба алмашиш муҳим аҳамиятга эга экани қайд этилди.

Меҳмонлар Қонунчилик палатасида парламентдаги кўпчилик – Демократик кучлар блокининг ташкил этилишига ва икки фракциянинг парламентдаги мухолифат деб эълон қилинишига алоҳида қизиқиш билдирдилар. Парламентдаги бундай янгиликлар кўппартиявийлик тизимни мустаҳкамлашга, парламентаризмни ривожлантиришнинг энг муҳим шартлари сифатида парламентлараро рақобат ва фракциялараро курашни кучайтиришига, парламентнинг ижро ҳокимияти фаолияти устидан амалдаги назоратининг самарали тизимини шакллантиришга хизмат қилиши таъкидланди.

Давра суҳбати конструктив руҳда, ўзаро манфаатдорлик асосида ўтди. Музокара давомида икки мамлакат парламентлараро ҳамкорлигини мустаҳкамлашга оид таклифлар ишлаб чиқилди.