Тошкент шаҳар ҳокими Раҳмонбек Усмонов «Тошкент шаҳри кўчалари, бино ва иншоотларидаги реклама, эълон ва турли ахборотларни тартибга келтириш бўйича қўшимча чора-тадбирлар тўғрисида»ги қарорни имзолади. Ҳужжат «Тошкент оқшоми» газетасида эълон қилинди.
Қарор Тошкент шаҳар кўчалари, хиёбонлари, бино ва иншоотлари, ёритиш устунлари, савдо ва хизмат кўрсатиш объектларига жойлаштирилган айрим реклама, эълон, ёзув ва турли ахборотларни ўрганиш жараёнида орфографик хатолар билан ёзилаётганлиги, уларда иккиламчи ва маънавиятимизга зид маънолар келиб чиқаётганлиги, «Давлат тили тўғрисида»ги, «Лотин ёзувига асосланган ўзбек алифбосини жорий этиш тўғрисида»ги ва «Реклама тўғрисида»ги Ўзбекистон Республикасининг қонунларида белгиланган талаблар бузилаётганлигини инобатга олиб қабул қилинди.
Ҳужжатга мувофиқ, Ички ишлар бош бошқармаси, Давлат солиқ бошқармаси, Архитектура ва қурилиш бош бошқармаси, Ер ресурслари ва давлат кадастри бошқармаси, Ободонлаштириш бош бошқармаси, Савдо, хизмат кўрсатиш соҳаси ва халқ истеъмол моллари департаменти, Хусусийлаштириш, монополиядан чиқариш ва рақобатни ривожлантириш Тошкент шаҳар ҳудудий бошқармаси, Ўзбекистон Савдо-саноат палатаси Тошкент шаҳар ҳудудий бошқармаси ва мутасадди ташкилот вакилларидан иборат ишчи гуруҳлари беш кун муддатда тузилади.
Мазкур ишчи гуруҳларга қуйидаги:
— тумандаги бино ва иншоотлар, савдо, умумий овқатланиш ва хизмат кўрсатиш объектлари ташқи томони ва атрофига жойлаштирилган реклама, эълон ва ахборотлардаги матн, ташқи дизайни ва ҳажмини ўрганиб чиқиш;
— орфографик хатолар билан ёзилган, «Давлат тили тўғрисида»ги, «Лотин ёзувига асосланган ўзбек алифбосини жорий этиш тўғрисида»ги Ўзбекистон Республикасининг қонунлари, архитектура талаблари ва маънавиятимизга зид реклама, эълон ва ахборотларни тартибга келтириш;
— тадбиркорлик субъектларига ўрнатиладиган реклама, эълон ва ахборотлар архитектура ва қонун талабларига жавоб бериши, матнларнинг давлат тилида тўғри ёзилиши ҳамда акс эттирилган кўринишлар маънавиятимизга мос бўлиши лозимлигини тушунтириш ҳамда мазкур тарғибот воситаларини жойлаштиришдан аввал, матнлар пухта текширилиши лозимлигини тавсия этиш;
— Ўзбекистон Республикасининг «Реклама тўғрисида»ги Қонунига мувофиқ, ташқи рекламани кўча ёритгичларининг таянчларида ҳамда кўча ва йўллар қатнов қисми узра жойлаштириш хавфсизлик техникаси талабларига риоя қилган ҳолда ва йўл белгилари, светофорлар, чорраҳалар, пиёдаларнинг ўтиш жойлари, умум фойдаланишдаги транспорт воситалари бекатларини тўсиб қўймаган ҳолда, шунингдек бундай реклама йўл белгилари ва тасвирини такрорламаган (ёки айнан тақлид қилмаган) тақдирда амалга оширилишини назорат қилиш;
— ташқи реклама, эълон ва ахборотларни маданий мерос объектлари, ташқи ёритиш устунлари, йўл белгилари ва светофорларда, уларнинг тиргакларида ёки ҳаракатни тартибга солиб турувчи бошқа ҳар қандай қурилмаларда, шунингдек дов-дарахтларни пайҳон қилиш ва туташ ҳудуддаги ободонлаштириш воситаларини бузиш йўли билан жойлаштириш тақиқланиши ҳақида огоҳлантириш;
— қонун ҳужжатларига зид бўлган, бино ва иншоотлар, савдо, умумий овқатланиш ва хизмат кўрсатиш объектлари пештоқларидаги орфографик хато билан ёзилган ёзувлар, тарғибот воситалари, иккиламчи маъноли сўзлар ва маънавиятимизга тўғри келмайдиган суратларнинг жойлаштирилишини олдини олиш чораларини кўриш вазифалари топширилади.
«Реклама тўғрисида»ги қонун ва бошқа қонун ости ҳужжатларини бузилганлик учун жавобгарлик масаласи қонун ҳужжатларида белгиланган тартибда ваколатли орган томонидан амалга оширилиши белгилаб қўйилди.
Шунингдек, туман ҳокимликлари, Маънавият тарғибот маркази (Ф.Маҳмудхўжаев) билан биргаликда мутахассисларни жалб қилган ҳолда, реклама, эълон ва ахборотлардаги матнлар тўғри ёзилганлигини кўриб чиқиш бўйича махсус жамоатчилик гуруҳи тузилади.
Изоҳ (0)