Февраль ойининг бошлари эди. Телефоним «бип» этди. Қарасам, мактуб келибди, Plantronics компаниясидан. АҚШга, компания офиси ва заводини томоша қилишга чақиришибди.
Каминаи камтарин, «Дарё» нашри раҳбари Фарҳод Файзуллаевнинг Америкага ташрифи шу тариқа бошланди.
Plantronics ҳақида тўхталадиган бўлсак, компания симсиз қулоқчин, гарнитура (қулоқчин ва микрофон) ва корпоратив мулоқот учун мўлжалланган қурилмалар ишлаб чиқариш бўйича етакчи компаниядир. Айнан Plantronics гарнитурасида Ойга биринчи қадам қўйган инсон — Нил Армстронг ўзининг машҳур сўзларини Ерга йўллаган:Бу инсон учун кичик қадам, инсоният учун улкан сакраш
Шу сабабли Plantronics ўз тарихи ва ютуқлари билан фахрланади. Компания ҳали-ҳануз АҚШ космик агентлиги — NASA билан ҳамкорлик қилади. Аммо ҳамкорлик айнан нимадан иборат эканлигини айтишмади — сир экан :-)
Компания бош офиси Калифорниядаги Кремний водийсида жойлашган бўлиб, ишлаб чиқариш эса Мексика, Хитой, Ҳиндистон каби давлатларда амалга оширилади.
Шундай қилиб, 16 март куни кечқурун Кореянинг Asiana Airlines авиакомпанияси самолёти билан йўлга тушдим. Манзил: Лос-Анжелес.
Лос-Анжелес АҚШ ғарбий соҳилидаги энг катта шаҳар бўлиб, Американи Осиё ва Тинч океани минтақаси билан боғловчи асосий авиатугун ҳисобланади.
Йўл анча олис: Asiana мени аввал Жанубий Кореяга элтди. Сеулнинг Инчхон аэропортида 6 соатлик танаффусдан сўнг дунёдаги энг катта йўловчи самолёти — Airbus А380’нинг иккинчи қаватида Лос-Анжелесга йўл олдик.
Таъкидлаш жоиз, Сеул аэропорти жуда замонавий бўлиб, 10 йилдан буён дунёнинг энг қулай аэропорти деб тан олиниб келинар экан.
Соат эрталабки 10 да самолёт Лос-Анжелес аэропортига қўнди ва биз, Россия, Озарбайжон, Қозоғистон ва Белоруссиядан келган ҳамкасблар билан Мексика чегарасида жойлашган Сан-Диего шаҳрига йўл олдик.
Калифорнияда ҳаво очиқ, илиқ — 15—20 даража экан. Тахминан 1,5 соатларда Chrysler микроавтобусида меҳмонхонага етиб олдик.
АҚШ шаҳарлараро йўлларида қизиқ қоида бор экан: йўлнинг чап бўлаги Carpool ёки High Occupancy Vehicle lane — ичида камида икки киши бўлган автомобиллар учун мўлжалланган экан. Яъни, машинангизда ўзингиз ва аёлингиз бўлса, бемалол ўша бўлакдан юриб кетаверасиз, бир киши бор автомобиллар бу бўлакда ҳаракатланиши мумкин эмас. Бундай бўлакдан асосий мақсад — битта автомобилдан кўп кишилар фойдаланишини рағбатлантириш.
Эртасига эрталаб Сан-Диегодаги меҳмонхонамиздан Мексикага, Plantronics маҳсулотлари ишлаб чиқариладиган заводга йўл олдик. Сан-Диегодан Мексиканинг Тихуана шаҳрида жойлашган заводгача автомобиль 40 дақиқа юрар экан. Аммо ўртада давлатлар чегарасини кесиб ўтиш керак.
АҚШ−Мексика чегарасига етиб боргач, Мексика томонида бир хоначага кирдик. У ерда иккита тўладан келган мексикалик аёл ўтирарди. Биз ҳужжатларимизни уларга топширдик ва улар паспортга «тақ» этиб муҳр босиб берди: Мексикага марҳамат!
Тихуана табиати бизникига ўхшаб кетади: иссиқ, чанг кўп, жигарранг тоғлар, дарахтлар ҳам кўп эмас. АҚШга солиштирганда фарқ жуда катта: машиналар жуда эски, йўллар ғадир-будир, аҳоли уйлари анчагина хароб.
Аммо Plantronics заводи 2009 йили қайта таъмирланган, АҚШ ва жаҳон стандартларига мослаштирилган замонавий ҳудуд экан. Завод кираверишида компания маҳсулотлари ясатиб қўйилган.
Боришимиз билан бизни завод мутасаддилари кутиб олди. Қисқа танишувдан сўнг улар компания тарихи ва завод ҳақида тақдимот ўтказиб беришди. Тақдимотда заводда 2300 киши меҳнат қилиши, 40 йилдан буён фаолият олиб бориши ҳақида сўз борди. Заводда кунига 70 000 қурилма ишлаб чиқарилишини айтиб ўтишди.
Яна бир қизиқ факт: завод томига 4300 дона қуёш панели ўрнатилган бўлиб, улар 1,1 Мегаватт элект қуввати ишлаб чиқарар экан. Бу миқдор заводни деярли тўлиқ электр энергияси билан таъминлашга етади.
Сўнгра завод бўйлаб экскурсия бошланди. Биз бирин-кетин заводнинг барча қисмлари: ишлаб чиқариш зонаси, офислар, лабораториялардан тортиб тайёр маҳсулотлар омборхонаси ва дам олиш хоналаригача айланиб чиқдик.
Ишлаб чиқариш цехида ҳар бир қаторга мониторлар ўрнатилган бўлиб, уларда ходимлар самарадорлиги, режа қай даражада бажарилаётгани акс этиб туради. Ҳар бир қурилма тайёр бўлганидан кейин махсус ходимлар уларни синовдан ўтказади.
Завод ҳудудида бир неча хил лабораториялар мавжуд бўлиб, уларда янги маҳсулотлар синовдан ўтказилади. Шундай лабораторияларнинг бирида акс-садосиз камера ҳам бор экан. Ичига кирсангиз, шунчалик тинч-ки, бирпас турсангиз, юрагингиз уриши ва томирларингиздан қон оқишини эшитсангиз бўлади. Зўр-а?
Компания Американики бўла туриб, нега заводи Мексикада жойлашганини сўраганимизда улар ишчи кучи арзонлигини айтишди. Заводда ишчи ходим тахминан 300 доллар ойлик олар экан. Шуни алоҳида қайд этиш жоиз-ки, заводда ходимлар учун қулай шароитлар яратилган. Масалан, бор-йўғи 1 долларга тушлик қилиш мумкин; бепул тренажёр зали, футбол ва баскетбол майдонлари фаолият юритмоқда. Яъни, шароит чакки эмас ;-)
АҚШ билан чегарадош Тихуана шаҳри ва унинг атрофида жуда кўп Америка компаниялари ўз заводларини жойлаштирган экан.
Кунимизни Мексикада ўтказиб, тушликка қовурилган саккизоёқ ва кактус еб, яна АҚШга қайтдик.
Plantronics’нинг Санта-Круз шаҳридаги бош офисига ташриф буюриш ва компания раҳбари билан учрашишни режалаштириб, яна йўлга отландик...
Ташрифнинг кейинги қисми ҳақида «Дарё»да тез кунларда :-)
Айтганча...
Агар Plantronics гарнитураларини сотиб олмоқчи бўлсангиз, Тошкентдаги Mars Solutions компаниясига мурожаат қилинг:Телефон: (+998-71) 200-33-55 (қўшимча 201), (+998-94) 634-09-99. Факс: (+998-71) 200-33-77
Веб-сайт: http://followmars.com
Изоҳ (0)