Навоий вилоятида коллежнинг биринчи босқичида ўқувчи йигит ва учинчи босқичда ўқувчи қиз ўртасидаги муносабатлар ўринсиз рашк туфайли аянчли якун топди, деб ёзади «Постда» газетаси.
Йигит ва қизнинг муносабатлари ота-оналари ва қариндошларнинг қулоғига етгач, йигитнинг онаси холасини эргаштириб совчиликка ҳам бориб қизнинг ота-онасидан розилик олиб келишган. Биргина тўй кунини белгилаш қолганди, холос.
Совчилар яхши хабар олиб келгач, йигит спиртли ичимликлар ва турли таомларни дастурхонга қўйиб, дўстларига зиёфат берди. Зиёфат чоғида дўстларидан бири унга қайлиғи енгилтак қизлигини, у билан ҳам пинҳона учрашиб турганини айтиб қизни ёмонлайди. Йигит дастлаб унинг кайфи ошиб қолди, деб ўйлаб эътибор бермайди. Дўсти унинг жаҳлини чиқаришга ҳаракат қилавергач, йигит унга ташланди ва оғзи-бурнини қон қилди.
Шундан кейин ҳам тинчимаган таниши йигитнинг қайлиғи бокира эмаслигини айтиб, қизга туҳмат қила бошлайди. Жаҳл отига минган йигит ундан исбот талаб қилади. Дўсти эса йигитнинг телефонидан қизга қўнғироқ қилиб, унга ҳам шу гапни айтади. Қиздан бу гаплар туҳмат эканлигини эшитган йигит унга ишонмай, машинасига ўтириб, қайлиғиникига йўл олади, бироқ қиз учрашишдан бош тортади.
Эртаси куни учрашишганда қиз йигитга бу туҳмат эканлигини тушунтирмоқчи бўлади. Бироқ йигит яна ишонмай ўша дўстини чақиради. Кайфи тарқаганига қарамай, дўсти ўша гапида туриб олади. Йигит яна жаҳл устида қизни қистовга олади, бироқ қизнинг гапларига ишонмайди.
Рашк, гумон ўтида ёнган йигит автомашинасига солиб қўйган пичоқни олди-да, қизнинг қорнига зарб билан санчди. Бирдан қиз ҳушини йўқотгач, йигит нима қилиб қўйганини англайди ва уни машинага ётқизиб, шифохонага олиб борди. Бироқ қиз ўзига келмасдан ҳаёт билан видолашди. Жиноят ишини ўрганиб чиққан суд йигитга тегишли жазо тайинлади.
Изоҳ (0)