«Аҳолини иш билан таъминлаш тўғрисида»ги Дастурга мувофиқ, 2015 йилда хорижий давларларда, жумладан Россияда юзага келган қийин иқтисодий вазият туфайли ўз юртига қайтаётган муҳожирлар учун иш ўринлари яратилади. Бу ҳақда UzDaily хабар берди.
Жами 409,5 мингта иш ўрнининг асосий қисми Сурхондарё, Самарқанд, Қашқадарё, Наманган, Андижон, Бухоро ва Фарғона вилоятларида ташкил этилади.
Муҳожирларга яшаш жойидан келиб чиқиб иш берилади, шунингдек улар тадбиркорлик фаолиятини бошлаши мумкин бўлади. Чунончи, улар давлатга тегишли фойдаланилмаётган объектларни, бундай объектлар бузилиши натижасида бўшайдиган ер майдонларини ишлаб чиқариш ёки хизмат кўрсатишни ташкил қилиш учун ижарага олиши мумкин бўлади.
Бундан ташқари, дастурда тижорат банклари томонидан муҳожирларга кичик кредитлар ажратилиши назарда тутилган.
Эслатиб ўтамиз, 2014 йил 13 ноябрь куни Ўзбекистон Республикаси Олий Мажлиси Сенатининг ўн олтинчи ялпи мажлисида сенаторлар Вазирлар Маҳкамаси томонидан ишлаб чиқилган 2015 йилда иш ўринлари ташкил этиш ва аҳоли бандлигини таъминлаш дастурини кўриб чиқиб, маъқуллаган эди.
Изоҳ (0)