Самарқанд вилояти Каттақўрғон шаҳридаги туғуруқ комплексида бир неча йилдан буён акушер-гинеколог вазифасида ишлайдиган аёл ўз ваколатидан фойдаланиб, жиноятга қўл урди. Бу ҳақда «Инсон ва Қонун» нашри хабар бермоқда. Нав­батчиликда турган пайтида унинг хонасига нотаниш жувон кириб, янги туғилган чақалоқни ташлаб, ном-нишонсиз йўқолиб кетади.

Шифокор эса бундан унумли фойдаланиб, олдиндан режалаштириб қўйган тамагирлик мақсадидаги жиноий хатти-ҳаракатини амалга оширади: узоқ йиллардан буён фарзанд кўришни орзу қилиб, даволанмаган шифохонаси қолмаган Зуҳра Расуловага чақалоқни 450000 сўм «суюнчи» пулига сотиб юборади.

Муаллима ўзининг бу ноқонуний хатти-ҳаракатини англамай, оналик бахт қуши бошига қўнганлигидан, энг муҳими, оиласи сақланиб қолганлигидан хурсанд бўлиб, ҳужжат тўғрилаш учун яна ноқонуний йўл тутади. Яъни таниши орқали юз минг сўм пора бериб, қиз чақалоқ дунёга келганлиги тўғрисида ҳужжат олишга уринади.

Яқинда жиноят ишлари бўйича Каттақўрғон шаҳар судида ушбу жиноий иш кўриб чиқилди. Акушер-гинеколог аёл қилмишига яраша қонуний жазо олди. Бола сақлаб олган муаллимага ҳам унинг фарзанд кўришни астойдил истаганлиги, бу ишларга тушунмай қўл урганлиги, қизалоқни ўз онасидек уч йилдан буён тарбиялаётганлиги, энг муҳими, бу ҳолат туфайли унинг оиласи сақланиб қолганлиги одил суд томонидан инобатга олиниб, тегишли тартибда қонуний жазо қўлланди.