28 ноябрь куни Тошкентда Россия Федерациясининг Ўзбекистон Республикасидаги элчихонаси томонидан ташкил этилган «2014—2015 йилларда Россия Федерациясининг Шанхай ҳамкорлик ташкилотидаги раислиги энг муҳим масалалари» мавзусида давра суҳбати бўлиб ўтди. Бу ҳақда UzDaily хабар берди.
Тадбирда Ўзбекистон ташқи ишлар вазири ўринбосари Жавлон Ваҳобов, Шанхай ҳамкорлик ташкилоти Минтақавий аксилтеррорчилик тузилмаси Ижроия қўмитаси директори Чжан Синьфэн, дипломатик миссиялар раҳбарлари, катта дипломатлар ва бошқалар қатнашди.
Россиянинг Ўзбекистондаги Фавқулодда ва Мухтор Элчиси Владимир Тюрденов Россия томони ШҲТни янада мустаҳкамлаш ва жипслаштириш, унинг халқаро позицияларини илгари суриш, Ташкилотнинг савдо-иқтисодий, инвестицион, илмий-техник, маданий потенциалини ривожлантириш мақсадларида ўз раислик мажбуриятларини муваффақиятли бажариш учун бор кучини ишга солишга тайёр эканлигини билдирди.
Тюрденовнинг таъкидлашича, ШҲТдаги энг муҳим масала минтақавий хавфсизлик бўлиб қолади. У шунингдек 2025 йилгача бўлган ШҲТ тараққиёт стратегиясини ишлаб чиқиш заруриятини тилга олди.
Изоҳ (0)