Саудия қироллик оиласи аъзоси гўёки 2001 йил 11 сентябрдаги терактларни молиялаштиришда қатнашган. Бундай баёнот билан ушбу терактларга алоқадорлиги учун АҚШнинг Колорадо штати қамоқхонасида ўз муддатини ўтаётган 46 ёшли Франция фуқароси Закария Муссауи чиқиш қилди, деб ёзади ТАСС.
Сентябрь ойида Муссауи Оклахома-Сити шаҳар судига мактуб юбориб, ушбу штатдаги Норман шаҳри ёзги мактабида ўқиши харажатларини саудиялик шаҳзода тўлаганини айтган. Маҳбус «ҳомий» исмини ошкор қилмаган. Унинг айтишича, Саудия қироллик оиласи аъзоси нафақат унинг ўқишини, балки 11 сентябрь куни йўловчи самолётларини олиб қочган қолган 19 нафар террорчиларни ҳам молиялаштирган.
Муссауи бу ҳақда судда кўрсатма беришга тайёрлигини айтди, бироқ мутахассислар унга бундай имконият берилишига шубҳа қилмоқда, чунки бундан аввал ҳам у бир-бирига зид баёнотлар берган. Саудия Арабистони ҳукумати эса қиролликнинг терактларга ҳар қандай алоқасини рад этмоқда.
Изоҳ (0)