Сеул ва Пхеньян ярим йил аввал тўхтаб қолган расмий алоқаларини юқори даражада янгилашга келишиб олишди, дея хабар бермоқда Interfax Жанубий Кореянинг бирлашув ишлари бўйича вазирлиги баёнотига таяниб. Унда айтилишича, музокаралар октябрь охири — ноябрь бошида бошланиши мумкин.
Жанубий Корея ОАВлари хабарларига кўра, ушбу битим 4 октябрь, шанба куни Инчеонга XVII Осиё ўйинлари ёпилиш маросимига ташриф буюрган КХДР делегациясининг Жанубий Корея ҳукумати билан учрашуви давомида тузилган.
Шимол ва Жануб ўртасида бундан аввалги — бир неча йил ичида дастлабки — музокаралар раунди февралда бўлиб ўтган, бироқ самарасиз якунланган эди. Ўшанда Пхеньян Жанубий Кореядан Америка қўшинлари билан олиб бораётган ҳарбий машғулотларини тўхтатишни сўраган эди.
Августда Сеул музокараларнинг яна бир раундини ўтказишни таклиф қилган, бироқ Пхеньян уни рад этиб, бунга Жанубий Корея ҳукуматининг «душманона сиёсати»ни рўкач қилган эди.
Изоҳ (0)