Испания конституциявий суди Каталония мустақиллиги ҳақидаги референдумни 5 ойга кечиктирди, Барселона уни 9 ноябрь куни ўтказмоқчи эди. Ушбу вақт давомида суд ташаббуснинг қонунийлиги ҳақида якуний ҳукм чиқариши керак. Бу ҳақда Euronews хабар берди.
Испания ҳукумати Каталониянинг референдум ўтказиш ҳақидаги декрети устидан шикоят қилгач, 12 нафар судья рекорд муддатда — бор-йўғи бир неча соат ичида бир овоздан қарор қабул қилди. Бош вазир Мариано Рахой бутун испанияликларга тегишли бўлган масалани Каталониянинг бир ўзи ҳал қила олмаслигини таъкидлади.
Энди автоном вилоят раҳбари 15—20 кун ичида суд қарори устидан арз қилиши мумкин.
Ажралиб чиқиш тарафдорлари 30 сентябрь, сешанба куни оммавий норозилик ҳаракатлари уюштиришга тайёрланмоқда.
Мадрид Испания конституциясига таянган ҳолда, каталонияликларнинг ташаббусларини ноқонуний деб ҳисобламоқда. У мамлакатнинг барча фуқаролари иштирок этган тақдирдагина мустақиллик ҳақида референдум ўтказишга рухсат беради.
Изоҳ (0)