Ispaniya konstitutsiyaviy sudi Kataloniya mustaqilligi haqidagi referendumni 5 oyga kechiktirdi, Barselona uni 9-noyabr kuni o‘tkazmoqchi edi. Ushbu vaqt davomida sud tashabbusning qonuniyligi haqida yakuniy hukm chiqarishi kerak. Bu haqda Euronews xabar berdi.
Ispaniya hukumati Kataloniyaning referendum o‘tkazish haqidagi dekreti ustidan shikoyat qilgach, 12 nafar sudya rekord muddatda — bor-yo‘g‘i bir necha soat ichida bir ovozdan qaror qabul qildi. Bosh vazir Mariano Raxoy butun ispaniyaliklarga tegishli bo‘lgan masalani Kataloniyaning bir o‘zi hal qila olmasligini ta’kidladi.
Endi avtonom viloyat rahbari 15—20 kun ichida sud qarori ustidan arz qilishi mumkin.
Ajralib chiqish tarafdorlari 30-sentabr, seshanba kuni ommaviy norozilik harakatlari uyushtirishga tayyorlanmoqda.
Madrid Ispaniya konstitutsiyasiga tayangan holda, kataloniyaliklarning tashabbuslarini noqonuniy deb hisoblamoqda. U mamlakatning barcha fuqarolari ishtirok etgan taqdirdagina mustaqillik haqida referendum o‘tkazishga ruxsat beradi.
Izoh (0)