Украина Россия газини Европа нархида сотиб олишга рози, дея хабар бермоқда Korrespondent.net Украина энергетика ва кўмир саноати вазири Юрий Продан баёнотига таяниб. У 26 сентябрь куни Берлинда бўлиб ўтган Евроиттифоқ ва Россия билан уч томонлама музокаралардан олдин бу ҳақда айтиб ўтди.

Журналистларнинг қандай нарх адолатли бўлиши ҳақидаги саволларига жавобан, вазир Европа биржаларидаги нархларни тилга олган. «Европа бозорларидаги нархлар (адолатлидир). Шу нарх бўйича тўлашга тайёрмиз», — деди Продан.

Ўз навбатида, Россия энергетика вазири Александр Новак музокаралар олдидан журналистларга РФ, Европа комиссияси ва Украина вакиллари Берлиндаги учрашувда Украина қарздорлигини жорий шартномалар бўйича ёпиш, Европага газ транзитининг ишончлилиги ва бошқа масалаларни кўриб чиқишини маълум қилди.