Apple компанияси Ирландия ҳукумати кўмагида шубҳали солиқ тизимларидан фойдалангани учун катта миқдорда жаримага тортилиши мумкин. Бу ҳақда The Financial Times маълумотига таяниб, «Интерфакс» хабар бермоқда.
Нашр қайд этишича, ушбу ҳафта Европа Иттифоқида монополияга қарши курашувчи Еврокомиссия Apple’нинг Ирландияда олиб борган солиқ операциялари билан боғлиқ терговнинг дастлабки хулосаларини тақдим этиб, компания раҳбариятига қарши айбловларни расман эълон қилади.
Мазкур вазият билан яқиндан таниш бўлганларнинг маълум қилишича, Apple ноқонуний солиқ схемалари орқали бойлик орттирганликда айбланади. Бу ерда гап оффшор ҳудуд (маълум бир давлатдаги норезидент компаниялар учун рўйхатдан ўтиш, лицензия олиш ва солиқ тўлашнинг алоҳида имтиёзли режими амал қиладиган ҳудуд ёки қисм)ларда беркитилган 137,7 миллиард доллар ҳақида бормоқда.
Жорий йилнинг июнь ойида Европа комиссияси солиқ тўлашдан бош тортганликда гумон қилинган Apple компанияси билан боғлиқ тергов ишлари бошланганини эълон қилган. Рақобат масалалари бўйича Европа нозири Хоакин Алмуния Apple’нинг Ирландия билан тузган битимига оид жиддий гумонлар борлигини маълум қилган.
Компания ходимлари эса мазкур мамлакатда фаолият юритиш жараёнида ноқонуний схемалардан фойдаланилганини рад этмоқда.
Шу билан бир вақтда, Брюсселда Еврокомиссия аъзолари гумони билан Fiat компанияси ва Люксембург ҳукумати, шунингдек, Starbucks компанияси ва Голландия ўртасидаги келишувлар борасида ҳам тергов-суриштирув ишлари олиб борилмоқда.
Изоҳ (0)