«Дарё» мухбирлари ва ўзбекистонлик интернет фойдаланувчилари хабарларига кўра, Тошкент шаҳридаги мобил алоқа фойдаланувчилари телефонларида «МТС» тармоғи кўрина бошлади. Тармоқ қурилмаларда «UZB MTS» номи билан пайдо бўлди.
«МТС» тармоғи пайдо бўлгани ҳақидаги хабарлар 24 сентябрь куни пайдо бўла бошлади. Бу ҳақда «Potrebitel.uz» гуруҳи аъзолари ҳам мамнуният билан хабар берди.
«Дарё» мухбирлари ушбу маълумотни тасдиқлади: Тошкентнинг Бодомзор ва Олмазор мавзеларида нашр мухбирлари телефонларида ҳам «МТС» тармоғи пайдо бўлди. Тармоқ Ўзбекистоннинг бошқа вилоятларида ҳам кўрина бошлагани ҳақида хабар берилмаган.
Аммо тармоққа уланганда қурилмада «No service» («Алоқа йўқ») деган ёзув пайдо бўлмоқда ва қўнғироқларни амалга оширишнинг имконияти йўқ. Бу борада компания тармоқни синовдан ўтказаётгани ҳақида тахмин қилиш мумкин.
Таъкидлаш жоиз, бу борада янги очилган Universal Mobile Systems МЧЖ ёки Қўмита томонидан расмий хабар берилмаган.
Эслатиб ўтамиз, Ўзбекистон Вазирлар Маҳкамаси «Мобил алоқа хизматларини кўрсатиш бўйича Universal Mobile Systems қўшма корхонасини тузиш тўғрисида»ги қарорни қабул қилган. Қарорда белгиланишича, UMS’ни тузиш ишлари 15 августгача, уни рўйхатга олиш ишлари эса 25 сентябрга қадар тугалланиши кутилмоқда. Бундан ташқари, қўшма корхона 1 ноябрга қадар техник, 1 декабрга қадар тижорий эксплуатацияни амалга оширади.
Аввалроқ, «МТС» компанияси Ўзбекистон ҳукумати билан муроса битими имзолагани, Ўзбекистонда янги қўшма корхона ташкил этиши, корхонанинг 50,01 фоизи «МТС»га, 49,99 фоизи эса Ўзбекистон ҳукуматига тегишли бўлиши ҳақида хабар берган эди.
Бундан ташқари, Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси UMS’га илк фаолиятини олиб бориши учун 2,5 миллион абонент рақами ажратгани, улардан 1,5 миллиони Тошкент аҳолиси учун берилган бўлиб, қолган рақамлар Ўзбекистон вилоятлари бўйича тақсимланганлиги 18 сентябрь куни эълон қилинган эди.
Қўшимча (15:45). «Дарё» муштарийларининг хабар беришича, «МТС» тармоғи Тошкент шаҳридан ташқари Фарғона вилояти ва Андижон шаҳрида ҳам кўрина бошлаган, аммо Қаршида ҳали кўринмаяпти.
Изоҳ (0)