Apple kompaniyasi Irlandiya hukumati ko‘magida shubhali soliq tizimlaridan foydalangani uchun katta miqdorda jarimaga tortilishi mumkin. Bu haqda The Financial Times ma’lumotiga tayanib, “Interfaks” xabar bermoqda.

Nashr qayd etishicha, ushbu hafta Yevropa Ittifoqida monopoliyaga qarshi kurashuvchi Yevrokomissiya Apple’ning Irlandiyada olib borgan soliq operatsiyalari bilan bog‘liq tergovning dastlabki xulosalarini taqdim etib, kompaniya rahbariyatiga qarshi ayblovlarni rasman e’lon qiladi.

Mazkur vaziyat bilan yaqindan tanish bo‘lganlarning ma’lum qilishicha, Apple noqonuniy soliq sxemalari orqali boylik orttirganlikda ayblanadi. Bu yerda gap offshor hudud (ma’lum bir davlatdagi norezident kompaniyalar uchun ro‘yxatdan o‘tish, litsenziya olish va soliq to‘lashning alohida imtiyozli rejimi amal qiladigan hudud yoki qism)larda berkitilgan 137,7 milliard dollar haqida bormoqda.

Joriy yilning iyun oyida Yevropa komissiyasi soliq to‘lashdan bosh tortganlikda gumon qilingan Apple kompaniyasi bilan bog‘liq tergov ishlari boshlanganini e’lon qilgan. Raqobat masalalari bo‘yicha Yevropa noziri Xoakin Almuniya Apple’ning Irlandiya bilan tuzgan bitimiga oid jiddiy gumonlar borligini ma’lum qilgan.

Kompaniya xodimlari esa mazkur mamlakatda faoliyat yuritish jarayonida noqonuniy sxemalardan foydalanilganini rad etmoqda.

Shu bilan bir vaqtda, Bryusselda Yevrokomissiya a’zolari gumoni bilan Fiat kompaniyasi va Lyuksemburg hukumati, shuningdek, Starbucks kompaniyasi va Gollandiya o‘rtasidagi kelishuvlar borasida ham tergov-surishtiruv ishlari olib borilmoqda.