Кеча, 23 сентябрь куни АКТ Ҳафталиги доирасида, Тошкентдаги Халқаро бизнес марказида АКТ Саммит 2014 – ахборот-коммуникация технологиялари бўйича саммит бўлиб ўтди. Бу ҳақда UzDaily хабар берди.
Ахборот-коммуникация технологиялари (АКТ) бўйича саммит ҳар йили Ўзбекистон ҳамда яқин ва узоқ хориждаги ўзаро алоқа ва ҳамкорлик муносабатларини ўрнатиш, АКТ соҳасидаги энг сўнгги ютуқлар билан танишиш ва соҳа тараққиётига оид долзарб масалалар муҳокамасидан манфаатдор бўлган соҳанинг асосий иштирокчиларини бир жойга жамлайди.
АКТ Саммит 2014 да «Давлат секторида АКТ», «Бизнесда АКТ», «Интернет ва ахборот ресурслари» каби учта асосий йўналиш бўйича маърузалар тақдим этилди. Саммит доирасидаги маърузаларнинг асосий мавзулари соҳадаги бошқарув сиёсатидаги тенденциялар ва асосий ўзгаришлар, АКТни ривожлантириш миллий дастурларини амалга оширишдаги ютуқлар ва муаммолар, жамият ҳаётининг турли йўналишларида АКТни татбиқ этиш тажрибалари, инфратузилма ривожланиши ва бошқа долзарб масалаларни қамраб олди.
Тадбир якунида тавсиялар ва Саммит Резолюцияси қабул қилинди.
Бу йил АКТ Саммит ишида Ўзбекистон, АҚШ, Жанубий Корея, Россия ва бошқа мамлакатлардан келган 600 га яқин делегатлар қатнашдилар. Улар орасида БМТ Тараққиёт дастури, Алоқа соҳасидаги минтақавий ҳамдўстлик ташкилоти, KISA каби халқаро ташкилотлар, Microsoft, Softline International, LG каби жаҳоннинг етакчи компаниялари вакиллари мавжудлиги тадбирнинг халқаро мавқеи юқори эканлигидан далолат беради.
Изоҳ (0)