Хитойнинг ZTE компанияси шу йилнинг декабрида Ўзбекистонда 4—5 хил янги моделдаги телефонларни ишлаб чиқаришни бошламоқчи. Бу ҳақда UZTE компанияси бош директори Хао Вейга таяниб, «Подробно» маълум қилди.
«Янги телефонлар Penzhong Xingsheng Ўзбекистон-Хитой қўшма корхонаси базасида Сирдарё вилоятидаги мавжуд линияда йиғила бошлайди. Барча телефонлар рақобатбардош хусусиятларга эга бўлиб, 200—300 доллар атрофидаги ўртача нарх сегментига мўлжалланган бўлади. Бугунги кунда линиянинг умумий қуввати йилига 150 мингта телефон ишлаб чиқаришга тенг бўлса, шуларнинг 40 фоизини янги моделлар ташкил этиши режалаштирилган», — дея таъкидлади Хао Вей.
Компания ишлаб чиқаришни кенгайтиришга 2 миллион доллар сафламоқчи. Бундан ташқари, ноябрь—декабрь ойларида Тошкентдаги «Флешка» мажмуасида фирма дўконини очиш кўзда тутилган, у ерда телефонлар ва уларга мўлжалланган фирма аксессуарлари сотилади.
Айни пайтда UZTE савдо белгиси остида тўрт хил моделдаги смартфонлар ишлаб чиқарилади, булар Grand V808, Grand M, Grand Х Quad ва Grand Х II.
Эслатиб ўтамиз, корхона 2013 йил июлда очилган, унинг смартфонлари эса ноябрь ойи охиридан Ўзбекистонда сотила бошлаган эди.
Изоҳ (0)