Шимолий Корея Олий суди мамлакатга гўёки жосуслик мақсадида ноқонуний келган 24 ёшли АҚШ фуқаросини 6 йил муддатга меҳнат лагерига ҳукм этди, дея хабар бермоқда «Новая газета» Associated Press’га таяниб.
Суд мажлиси бир ярим соат давом этди.
Суд баёнотига кўра, Мэттью Миллер шу йилнинг 10 апрелида Пхеньян паспорт назоратида визасини йиртиб ташлаган ва кейинроқ КХДРда инсон ҳуқуқлари билан боғлиқ вазиятни махфий равишда ўрганиш учун маҳаллий қамоқхонага тушмоқчи бўлганини тан олган.
Миллер адвокат ёллаш ҳуқуқидан бош тортди. Ҳукм чиқарилганидан сўнг америкаликни суд залидан қўлига кишан кийдирилган ҳолда чиқариб кетишди.
Апрель ойида АҚШ фуқароси Шимолий Кореядан бошпана сўрагани маълум бўлди. Бироқ айбловчи томон бунинг шунчаки ҳийла-найранг бўлганини айтди. Улар шунингдек, Миллер ўз гаджетларида АҚШ ва Жанубий Корея ҳарбийлари ҳақида махфий маълумот борлигини айтиб маҳаллий ҳукуматни алдаганини таъкидлади.
Ўтган ҳафтада Associated Press’га берган қисқа интервьюсида Миллер АҚШ президенти Барак Обамага хат ёзиб, ҳали жавоб олмаганини айтган эди.
Айни пайтда Шимолий Кореяда ҳукумат томонидан қўлга олинган уч нафар америкаликлар сақланмоқда. Яқин орада КХДРга сайёҳ сифатида ташриф буюрган Жеффри Фоул иши бўйича суд бўлиши кутилмоқда. У май ойида ўзининг меҳмонхона номерида Инжил китобини қолдириб кетганликда айбланиб ҳибсга олинган. Учинчи америкалик — миссионер Кеннет Бей «душманларча хатти-ҳаракатлар» айблови билан 15 йиллик қамоқ жазосини ўтамоқда.
Изоҳ (0)